মৰিগাঁৱলৈ আহিবা (কবিতা) - দিগন্ত কুমাৰ বড়া / গছৰগুৰি, মৰিগাওঁ

বহাগতে আহিবা আমাৰ গাঁৱলৈ
দেখুৱাম গোঁসাই উলিওৱা মেলা ।
ত্ৰিভূবন ঘূৰিও নাপাবা তুমি
জেঠৰ বাঙিয়া মেলা ।।

আহাৰত আহিবা ভূঁই ৰুবলৈ
শাওণত পথাৰ চাবা ।
ভাদত দেখিবা নাম কীৰ্তনেৰে
পাতেকীবড়িৰ চোতাল ভৰা ।।

আহিন মহীয়া পূজাৰ বতৰ
কি যে মজা লাগে ।
কাতি-আঘোণত ৰাস চাবলৈ
হিলদল ভাঙি আহে ।।

পুহ মহীয়া জাৰত কঁপি
পবিতৰাৰ গঁড় চাবা ।
মাঘত আহিবা জোনবিললৈ
ঐতিহ্যক ফিৰাই পাবা ।।

ফাগুনৰ ফাকুৱা সকলোতে হয়
আহিলেহে বুজি পাবা ।
চ'তলৈকে বাট চাম, মায়ংৰো যাদু দেখুৱাম
মাথো এবাৰ আহি যাবা ।।

কবি - দিগন্ত কুমাৰ বড়া ।
ঠিকনা - গছৰগুৰি, মৰিগাঁ‌ও
ভ্ৰাম্যভাষ - ৯৬১৩৬-৯৬১৪৬